LEÓN SALAMANCA ZAMORA | PAIS LEONÉS

L’AXETIVU

Ye l’elementu la oración que furrula comu ayacente nominal, atributu, atributu de suxetu y de complementu direutu.

2.1 Formación del femeninu.

2.1.1 Masculinu –u / femeninu –a.

- roxu - roxa
- malu - mala
- mariellu - mariella

2.1.2 Masculinu en consonante / femeninu –a.

- llïonés - llïonesa
- vieyín - vieyina

2.1.3 Irregularidaes na formación del femeninu.

2.1.3.1 Masculinu –áu / femeninu –ada.

- moyáu - moyada

2.1.3.2 Masculinu –íu / femeninu –ida.

- bruñíu - bruñida

2.1.3.3 Masculinu –eiru / femeninu –eira.

- faladeiru - faladeira

2.1.4 Confluencia morfolóxica ente singular y plural.

2.1.4.1 Axetivos finaos en –e.

- home llibre - muyer llibre
- llabor fácil - xera fácil

2.1.4.2 Axetivos finaos en –a.

- esi especialista - esa especialista

2.1.4.3 Axetivos terminaos en consonante.

- animal xabaz - bestia xabaz

2.2 Formación del plural.
2.2.1 Axetivos masculinos.

2.2.1.1 Singular en vocal átona / plural –s.

- mariellu - mariellos
- roxu - roxos

2.2.1.2 Singular en vocal tónica / plural –s.

- maravedí - maravedís
- xabalí - xabalís

2.2.1.3 Singular en consonante / plural en consonante + -es.

- manguán - manguanes
- feliz - felices

2.2.1.4 Singular –ín / plural –os.

- llaín - llaínos
- ruin - ruinos

2.2.1.5 Singular –án / plural –os.

- argoyán - argoyanos

2.2.2 Axetivos femeninos.

2.2.2.1 Singular en vocal átona / plural –s.

- mala - malas
- moyada - moyadas
- babiana - babianas
- afayaiza - afayaizas

2.2.2.2 Singular en vocal tónica / plural –s.

- marroquí - marroquís

2.2.2.3 Singular en consonante / plural –es.

- xabaz - xabaces

2.2.3 Confluencia morfolóxica ente singular y plural.

Las pallabras llanas finadas en –s caltienen la misma forma en singular y plural.

- home voceras - homes voceras
- muyer voceras - muyeres voceras

2.3 Concordancia axetivu / sustantivu.

L’axetivu caltién una concordancia de xéneru respeutu del sustantivu al qu’acompaña.

- el neñu guapu - la neña guapa
- la lloba prieta - el llobu prietu

La concordancia caltiénse independientemente de la posición del axetivu respeutu al sustantivu.

- ñeve nidia
- nidia ñeve

Si l’axetivu acompaña a deillos nomes, apaecerá concordandu en xéneru y cona forma plural.

- el fiyu y la fiya yeran tontos

Si los sustantivos asociáos al axetivu son de xéneru desemeyáu ente sí, l’axetivu tendrá la forma del masculinu plural.

- el lleite y la manteiga llïoneses

2.4 Gradación del axetivu.

2.4.1 Gráu positivu.

Preséntase na significación simple ou asoluta.

- País llibre
- asuntu abegosu

2.4.2 Gráu comparativu.

2.4.2.1 De superioridá.

Pa esta fin emplégase la construción “más+axetivu+que+términu de referencia”.

- el perru ye más vieyu que la perra
- Tomasín ye más bilortu que Xuacu

2.4.2.2 De inferioridá.

Pa esta fin emplégase la construción “menos+axetivu+que+términu de referencia”.

- la ciudá ye menos prestosa que’l pueblu
- ye un home menos fulgacián de lu que paez

2.4.2.3 De igualdá.

Pa esta fin empléganse las costruciones que sigen darréu:

-“tan+axetivu+comu+referencia”.

- el pueblu ye tan guapu comu la ciudá

- “igual de+axetivu+que+referencia”.

- el pueblu ye igual de guapu que la ciudá

- “lu mesmu de+axetivu+que+referencia”.

- el pueblu ye lu mesmu de guapu que la ciudá

2.4.3 Gráu superlativu.

2.4.3.1 Asolutu.

- Añadiendu’l sufixu –ísimu, -ísima:

- guapísimu - guapísima

- Anteponiedu’l prefixu re-:

- reguapu

- Anteponiendu’l prefixu requete-:

- requeteguapu

- Anteponiendu alverbios de cantidá:

- muitu guapu
- mui guapu
- abondu guapu
- enforma guapu
- bien guapu

2.4.3.2 Relativu.

Empléganse las construciones que siguen darréu:

- “artículu+más+axetivu+de+referencia”.

- ye’l más guapu de toos

- “artículu+menos+axetivu+de+referencia”.

- ye’l menos guapu de toos

2.4.4 Nota sobru dalgunos axetivos.

Los axetivos bonu, malu, grande, primeiru, terceiru y postreiru tien formas apocopadas en singular antepuestos al sustantivu.

- añu bonu / bon añu
- hibiernu malu / mal hibiernu
- nevada grande / gran ñevada
- pisu primeiru / primer pisu
- cabudañu terceiru / tercer cabudañu
- falamientu postreiru / postrer falamientu