LEÓN SALAMANCA ZAMORA | PAIS LEONÉS

EL DOURU

Nombre: Arribes
Comarca: Las Arribes
Mensajes: 13
Fecha: 26-01-2006 20:37:45

DOURU DEL MIÉU AMORE

Douru del miéu amore,

¡Ei Douru, cachones fondos!,

onde las túas auguas cantan,

onde las túas auguas penan.

La túa color rellumbra,

la túa color ferrina,

l'augua ye'l tou sange

que llambe dulce las piedras.

Munchas gracias polos soutos

y tamién polas ribeiras,

polos tous escuros coutos

polas túas chanas veigas.

Abrázate eillí'l salgueiru,

los umeiros t'apareyan,

faite compaña el sanguiñu,

lluéu'l carrizu te beisa.

L'outoñu frescu al chegare,

date mil fueyas mariellas,

pardas de los carbayos,

las roxas de las fuseiras.

Comienzas brava en Miranda

ente Pertual y las Hespañas.

Brincas fiendas y cabuercos,

reinu de l'águila negra.

Faces brancos gargallones

con esplumosas gedeyas.

¡Escucha los tous tambores,

brigosas retembladeiras!

L'augua suena eillí a cantare,

you escucho eillí pauliteiras.

¡Música del tou nacere,

sábeme a voces melgueiras!

Eillí crez la regalicia,

maruéganos, nebreiras,

perfantones escanzreixos

y nel branu l'azucena.

Riegas, cerreos y llameiros

onde naz la surbia fiera

cola que los bravos celtas

envelenaban las frechas.

Eillí los fríos d'iviernu

facen xielu lo que velan,

fasta que faga calore

la nieve pousa na sierra.

Al pasare pol Mieza

d'oliveiras fiendes penas

y más abaixo ente foces

bañas molinos na Veiga.

Nel altu d'aquel outeiru

las peñas lu nuesu velan.

N'aquel castru veladeiru

de sange paez la tierra.

Yes llar de peces

grandes d'augua nas pesqueiras

que s'atopaban a esgaya

al llimpiare nas acenias.

Guei solu restan conchales

vieyos de más de ochenta.

Dizse qu'al pechar molinos

muerre triste aqueilla pesca.

Yes el cabeiru ríu llibre

que nun controla Castiella,

l'últimu gran ríu,

que nel nuesu Reinu queda.

Vieyu muerres n'Oportu

dando fuercia al océanu

entoncies ye la túa augua

mansa comu na estanqueira.

Voume chorandu al pasare,

dasme morrina qu'amuela.

Yes el pai de la mía tierra,

¡puxa'l Douru y las súas fasteiras!

(Basáu nun poema carbayés sobre'l Ríu Negru)

responder a este tema volver

Páginas
0