Parlamentu asturianu refuga la Llei de reforma Local por suponer "un ataque ensin precedentes a los conceyos"

21 mar 2014 0 comentarios

UVIÉU, 21 Mar. (EUROPA PRESS) – Los grupos del Parlamentu asturianu, a esceición del PP, amosaron esti vienres el so refugu a Llei de Racionalización y Sostenibilidá de l’Alministración Local por suponer “un ataque ensin precedentes a l’autonomía municipal y una inxerencia nes competencies” y encamentaron al Gobiernu rexonal a formular el correspondiente recursu d’inconstitucionalidá.
   Fixéronlo al aprobar una moción del grupu parlamentariu d’IX defendida por Marta Pulgar, a la que’l PP dio’l so votu en contra. “Trátase d’una mala llei que nun queremos, de sobra encontada la so inconstitucionalidá y con nefastes consecuencies pa la calidá del serviciu a los ciudadanos”, dixo Pulgar.
   La moción tamién solicita que l’Executivu presente ante la Cámara nel actual periodu de sesiones un informe evaluación del impactu de l’aplicación n’Asturies de dicha llei, que recueya ente otros aspeutos l’impactu económicu, los servicios que pasen a ser competencia de l’autonomía o’l calendariu concretu d’aplicación.
   Pulgar destacó que la moción recueye tamién encamentar al Conseyu de Gobiernu a encetar l’aplicación n’Asturies de la llei de manera alcordada colos conceyos del Principáu cumpliendo dellos criterios como garantizar el caltenimientu d’empleos públicos y el nivel calidable del conxuntu de los servicios. Esti puntu foi refugáu al nun cuntar col sofitu del PSOE.
   “La que presentamos ye una moción coherente cola interpelación que-y fiximos al Gobiernu y coherente cola axenda política actual. El Gobiernu tien de tener una fueya de ruta marcada y definida”, manifestó Pulgar.
   La diputada del PSOE, Adriana Lastra, recordó que’l conseyu de Gobiernu yá pidió informe al consultivu pa presentar el recursu de inconstitucinalidá ante una “mala llei que pretende acabar col estáu de bienestar”.
   Lastra criticó la falta d’información ya indicó que “nin siquier el Ministeriu sabe como se va a aplicar esta llei” y punxo en dulda que los quince alcaldes del PP del Principáu tean acordies con la postura caltenida pol Grupu parlamentariu del PP.
   Dende Foru Asturies, la so diputada Marina Huerta, recordó que Foru presentó hasta 34 enmiendes nel Congresu a dicha llei y toes elles fueron refugaes. Asina recordó qu’el so partíu considera qu’esta llei nun defende nel problema del financiamientu o suficiencia de les Alministraciones locales.
   Compartió amás la invasión de competencies que supón esta llei, que se ven inclusive amontaes n’Asturies coles parroquies rurales y reprochó al Gobiernu central la falta d’información.
   Dende UPyD, el so diputáu Ignacio Prendes, indicó que tamos ante “una mala llei que nun enceta los problemes de les Alministraciones locales y que supón un retrocesu y perda calidable democrática”.
EL PP DEFENDE LA LLEI
   El grupu del PP quedó namás na so defensa de la Llei. Asina, a xuiciu del diputáu del PP, Matías Rodríguez, discutinios como la d’esta moción “nun lu correspuenden a esti parlamentu y amás debiliten la credibilidá del mesmu”. Asina aportunó que nun hai unanimidá en contra d’esti testu al que la mayoría de CCAA dieron el so sofitu, amás de los miles de conceyu.
   Aportunó en qu’esta llei “yera y ye necesaria y urxente dempués de que los socialistes nun fixeren nada polos conceyos n’años” y acusó a los grupos de la esquierda que “mientres ellos mienten el Gobiernu del PP va siguir presentando reformes p’ameyorar la calidá democrática”.
   Rodríguez entornóse en defender una llei qu’aseguró qu’en nengún casu quita competencies a los conceyos y lo que busca ye garantizar y ameyorar los servicios qu’empresten los consistorios y la tresparencia local.

Debes estar registrado y con tu cuenta para poder insertar comentario o también usar tu usuario de Facebook para insertar tus comentarios:

Comenta esta noticia en Facebook

cerrar