Rematóu’l cursu de llionés de Faceira en Llión ciudá

6 jun 2015 0 comentarios

Más de seis meses pasonen xa dende esi primer día que pa mina vai ser bien difícil d’esqueicer. Azarientu, ensin cuasimente dormir durgante a nueite anterior y perguntándome qué sería a alcontrar tres cruciar a puorta, empobinaba us mieus pasos a Skala formación pa impartir as dúas horas iniciales das cuarenta y ocho que duraría’l cursu de llionés que dende Faceira organizábamos pola primer vez en Llión ciudá.
Años atrás tamién tuvi a oportunidá d’afalar outros cursos pero esta ocasión yera enforma especial, un gran retu. Us oxetivos estaban craros: dar a tódolos interesaos a posibilidá d’achegase á nuosa llengua cona dignidá, seriedá y rigor qu’amerita, respetando a realidá oral del idioma y ufrindo un modelu curiosu que conectara directamente cono llionés on güei vivu en comarcas cumo Cabreira, L.laciana, Bierciu ou Senabria.
Muitos fonen us materiales conos que traballemos a lo llargo d’esti añu, principalmente a guía gramatical de llionés Xurdir amás d’ocho unidades didácticas con diálogos, vocabulariu, exercicios ou aspectos da cultura tradicional llionesa. Tampouco nun faltonen grabaciones y vídeos pero, con todo, lo más arriquecedor y esperanzador foi de fincia comprobar outra vuelta en primer persona cumo aínda queda xente seria y comprometida con un enorme interés por conocer, estudiar y defender a nuosa llengua, cuestión que quedóu bien crara énte a regular asistencia a crase  dus participantes y el gran nivel que demostronen á hora de facer us exercicios correspondientes a cada unidá.
Aspero que us alumnos deprendieran comigo tanto cumo you deprendí d’ellos. Personalmente nun podría quedar más feliz de lo que quedéi. Agora touca dir pensando xa no cursu del próximu añu… ¡a la xeira!
Fuente: xairu.info

Debes estar registrado y con tu cuenta para poder insertar comentario o también usar tu usuario de Facebook para insertar tus comentarios:

Comenta esta noticia en Facebook

cerrar